Në daljen e tij të parë pas zgjedhjeve të 28 qershorit mbrëmjen e djeshme në emisionin “Zonë e Lirë” të Arian Çanit, kryeministri Edi Rama arrin të shënojë sërish një rekord të ri përsa i përket interesit të teleshikuesve.
Sipas të dhënave zyrtare të matjes së shikueshmërisë së televizioneve të raportuara nga kompania Abacus Research që e ofron këtë shërbim që prej vitit 2011, TV Klan arriti kulmin e shikueshmërisë me një vlerë rating prej 35.82% përkundrejt 33.79% që kishte arritur në daljen e 9 qershorit të kaluar, kur Rama theu për herë të parë akujt me daljen e parë pas 7 vitesh mungese në programin e gazetarit të mirënjohur.
Ashtu siç mund të dallohet qartësisht edhe nga të dhënat e pasqyruara në grafikët bashkëlidhur, interesi i publikut erdhi duke u rritur menjëherë pas fillimit të programit në orën 21:00, ku Top Channel hyri me epërsinë e vlerës 23.71% rating përkundrejt 19.45% të TV Klan.
Pikërisht në orën në orën 22:23, shikueshmëria e programit arriti kulmin, duke mbajtur të mbërthyer përballë ekranit të TV Klan 843 072 teleshikues, ndërkohë që në të gjithë kohëzgjatjen e vetë, programi u ndoq mesatarisht nga 478 040 teleshikues, ose 20.31% e shqiptarëve, me një vlerë share prej 30.85%.
Po ashtu, edhe trasmetimi Live në kanalin online “ERTV” të profilit zyrtar të kryeministrit arriti një vlerë maksimale prej 8 mijë e 400 ndjekësish, një shifër që flet sërish për shkallën e lartë të vëmendjes së përdoruesve të këtij rrjeti social për intervistën e mbrëmshme.
28/10/2017 09:05 AM
2014 © Aplikacionet dhe lajme për Shqipërinë