The Guardian - Ja si po i financon Google “shkatërruesit klimatik” - Android

Google u ka dhënë kontribute madhore financiare disa prej mohuesve më famëkeq të krizës klimatike në Uashington, shkruan sot një hulumtim i publikuar në The Guardian.

Me gjithë insistimin e saj që mbështet veprime politike mbi krizën e klimës, gjigandi i kërkimit i ka favorizuar kompanitë, krerët e të cilëve shkaktojnë përkeqësimin e trendit të ndotjes.

Ndër qindra grupe që kompania ka renditur në faqen e saj të internetit si përfitues të dhënies së kontributeve, figurojnë edhe dhjetëra organizata që kanë bërë fushatë kundër legjislacionit të klimës, kanë vënë në dyshim nevojën për veprim, ose kanë kërkuar vazhdimisht të mos mbështesin mbrojtjet mjedisore të miratuara nga Obama.

Lista përfshin Institutin e Ndërmarrjeve Konkurruese (CEI), një grup konservator i politikave që ishte i dobishëm për ta bindur administratën Trump që të braktiste marrëveshjen Klimatike të Parisit.

Google tha se ishte e zhgënjyer nga vendimi i SHBA-ve për të braktisur marrëveshjen globale të klimës, por ka vazhduar të mbështesë CEI-në fuqimisht.

Google është renditur gjithashtu si një sponsor për një takim të ardhshëm vjetor të Rrjetit të Politikave Shtetërore (SPN), një organizatë ombrellë që mbështet grupet konservatore përfshirë Institutin Heartland, një grup radikal antik shkencor që e ka quajtur aktivisten adoleshente Greta Thunberg si “mashtruese histerike”.

Anëtarët e SPN-së kohët e fundit krijuan një webfaqe të “pengut të klimës” që thotë se “mjedisi ynë natyror po bëhet më i mirë” dhe “nuk ka krizë klimatike”.

Google ka mbrojtur kontributet ndaj SNP-së, duke thënë se “bashkëpunimi” i saj me organizata të tilla si CEI “nuk do të thotë se ne e miratojmë axhendën e plotë të tyre”.

Një zëdhënës i Google tha se mbështetja financiare shkon për organizata nga i gjithë spektri politik që mbrojnë “politika të forta teknologjike”.

Por aktivistët e mjedisit dhe kritikët e tjerë thonë se, për një kompani që synon të mbështesë veprimet globale mbi ndryshimin e klimës, favore të tilla nuk janë të pranueshme.